Ўзбекистон ноябр ойида дунёдаги энг йирик олтин харидорлари учлигига кирди

Тошкент, Ўзбекистон (UzDaily.uz) — 2025 йил ноябрь ойида Ўзбекистон дунёдаги энг йирик олтин харидорлари учлигига кирди: мамлакат Марказий банки бир ой ичида 10 тонна қимматбаҳо металл харид қилди. Бу ҳақда Бутунжаҳон олтин кенгаши (World Gold Council)нинг навбатдаги ҳисоботида маълум қилинган.

Ташкилот маълумотларига кўра, ноябрь ойида марказий банкларнинг олтин бўйича соф харидлари жами 45 тоннани ташкил этган. Талаб ўсишига асосий ҳиссани глобал иқтисодий ноаниқлик шароитида олтин захираларини фаол ошираётган ривожланаётган мамлакатлар регуляторлари қўшган.

Иккинчи ой кетма-кет энг йирик харидор Польша бўлди: унинг марказий банки захираларни 12 тоннага оширди. Ундан кейин 11 тонна олтин харид қилган Бразилия жой олди. Ўзбекистон эса 10 тонна олтин сотиб олиб, учинчи ўринни эгаллади ва ривожланаётган иқтисодиётлар орасида бозорнинг энг фаол иштирокчиларидан бири эканини яна бир бор тасдиқлади.

Салмоқли харидорлар қаторига захираларини 8 тоннага кўпайтирган Қозоғистон ҳам кирди. Чехия, Хитой ва Индонезияда эса харид ҳажмлари нисбатан мўътадил бўлди.

Шу билан бирга, ноябрь ойида марказий банклар томонидан олтин сотилиши чекланган тус олди. Қимматбаҳо металлни фақат Иордания, захираларини 2 тоннага қисқартириб, ҳамда 1 тонна олтин сотган Қатар реализация қилди.

Ҳисоботда шунингдек, йил якунларига кўра Ўзбекистон дунёдаги энг йирик олтин сотувчилари учлигида қолиб келаётгани, бу кўрсаткич бўйича фақат Сингапур ва Россиядан ортда экани қайд этилган. Бу эса мамлакатнинг олтин-валюта захираларини бошқаришда мослашувчан стратегия юритаётганини кўрсатади.