Тошкент, Ўзбекистон (UzDaily.uz) — Расмий учрашув доирасида Ўзбекистон Миллий ижтимоий ҳимоя агентлиги директорининг ўринбосари Усмон Шарифхўжаев Қатар Давлати Вақфлар ва ислом ишлари вазирининг ўринбосари Муҳаммад бин Ҳамад Аль-Қавари билан музокаралар ўтказди.

Суҳбат чоғида томонлар ижтимоий ҳимоя соҳасидаги икки томонлама ҳамкорликни янада чуқурлаштириш истиқболларини муҳокама қилдилар. Айниқса, бир ой муқаддам амалга оширилган Қатар Вақфлар ва ислом ишлари вазири Ганем бин Шаҳин бин Ганем Аль-Ганимнинг Ўзбекистон Миллий ижтимоий ҳимоя агентлигига расмий ташрифи чоғида илгари сурилган ташаббусларни амалга ошириш бўйича амалий чора-тадбирларни муҳокама қилишга алоҳида эътибор қаратилди.

Музокаралар натижасида ижтимоий ёрдамга муҳтож аҳоли қатламлари учун хизматлар сифатини ошириш, ногиронлиги бўлган болалар учун таълим ва реабилитация имкониятларини кенгайтиришга қаратилган қўшма лойиҳаларни ишлаб чиқиш ва амалга ошириш бўйича келишувга эришилди.

Томонлар таъкидладиларки, ушбу соҳадаги ҳамкорлик нафақат эҳтиёжманд аҳоли қатламларини қўллаб-қувватлашга, балки инклюзив ижтимоий хизматларни ривожлантиришга, шунингдек, Ўзбекистон ва Қатар ўртасидаги дўстона муносабатларни тажриба ва илғор амалиётлар алмашуви орқали мустаҳкамлашга ҳам хизмат қилади.