Ўзбекистон корхоналарга ўз маҳсулотларини илгари суриш учун Москвада бепул савдо майдончаларини тақдим этади

Тошкент, Ўзбекистон (UzDaily.uz) — Ўзбекистон Республикаси Инвестициялар, саноат ва савдо вазирлиги томонидан маҳаллий маҳсулотларни Россия бозорида тарғиб қилиш ва сотиш учун ноёб ва мутлақо бепул шароитлар яратилди.

Москва шаҳридаги «Садовод» савдо мажмуасида савдо нуқталари ва омборхоналар ижарага олинди ва ўзбек компанияларига бепул тақдим этилмоқда.

Бу эса миллий брендларимизни Россиянинг энг йирик бозорида намойиш этиш ва таништириш, минглаб харидорларга маҳсулот таклиф қилиш имконини беради.

Мажмуадаги бевосита савдо жараёнидан ташқари, экспортёрлар Россиянинг Wildberries, Ozon, Yandeks.Market йирик онлайн-платформаларига ва бошқа сайтларига чиқиш ҳамда бутун мамлакат бўйлаб мижозларни қамраб олиш имкониятига эга бўлади.

Тадбиркорлар учун бу – етказиб бериш географиясини кенгайтириш, узоқ муддатли ҳамкорлик алоқаларини ўрнатиш ва Россия бозорида минимал харажатлар билан мустаҳкам жой эгаллаш учун реал имкониятдир.