Тошкент, Ўзбекистон (UzDaily.uz) — 28-30 апрель кунлари Тошкентда экспертларнинг асосий гуруҳи йиғилди: онкологлар, таҳлилчилар, Соғлиқни сақлаш вазирлиги, ЖССТ ва стратегик марказлар вакиллари. Биргаликда 2025-2035 йилларга мўлжалланган Саратон касаллигига қарши курашиш миллий стратегиясининг дастлабки версияси келишилди ва Ҳаракатлар режасини шакллантиришга старт берилди. Бу ҳақда ЖССТнинг Ўзбекистондаги матбуот хизмати хабар берди.

Миллий стратегия устида олиб борилаётган ишлар "Ўзбекистон Республикасида онкологик хизматларни ривожлантириш лойиҳасини қўллаб-қувватлаш" лойиҳасининг иккинчи босқичи доирасида, Ислом тараққиёт банки иштирокида амалга оширилмоқда.

ЖССТ маълумотларига кўра, бугунги кунда Ўзбекистонда 100 мингдан ортиқ одам саратон касаллигига чалинган. Ҳар йили 20 000 дан ортиқ янги ҳолатлар аниқланади. Уларнинг кўпчилиги эрта аниқланиб, ўз вақтида даволанса, саратоннинг олдини олиш ёки ундан бутунлай соғайиб кетиш мумкин.

"Агар саратон касаллигини эрта аниқлаб, даволаниш имконияти таъминланса, бу касалликларнинг кўпини олдини олиш ёки даволаш мумкин эди. Аммо тизимли ёндашувсиз бунга эришиш мумкин эмас. Шу боис келажак режасининг ҳар бир элементи, ҳар бир мақсад ва ҳар бир ҳаракат - жиҳозлаш ва кадрлар тайёрлашдан тортиб, маданий тўсиқларни бартараф этиш ва аҳоли ўртасида ишончни оширишгача бўлган масалалар диққат билан муҳокама қилинди", - дея таъкидлади ЖССТ.

“Асосий мақсад нафақат касалланиш статистикасини камайтириш, балки ҳаётни сақлаб қолишдир”, - дея таъкидлади халқаро ташкилот вакиллари.

Эслатиб ўтамиз, Ўзбекистонда 2025 йилдан бошлаб бачадон бўйни ва кўкрак бези саратонини эрта аниқлаш дастури иш бошлайди. Аёллар мунтазам равишда скрининг текширувидан ўтишлари мумкин бўлади: бачадон бўйни саратонини аниқлаш учун HPV тестлари ва суюқ цитология, кўкрак бези саратонини аниқлашда эса ультратовуш ва маммография қўлланилади. Диагностика ва даволаш харажатлари давлат томонидан қопланади.