Ўзбекистон фарматсевтика саноати делегатсияси Туркияга амалий ташриф билан келди

Тошкент, Ўзбекистон (UzDaily.uz) — Фармацевтика тармоғини ривожлантириш агентлиги ташаббуси билан жорий йилнинг 14-17 декабрь кунлари Ўзбекистон фармацевтика соҳаси вакилларидан иборат делегациянинг Туркия Республикасига хизмат сафари ташкил этилди.

Мазкур ташриф фармацевтика саноатини модернизация қилиш, ишлаб чиқариш жараёнларини халқаро стандартлар асосида такомиллаштириш, маҳаллий корхоналарнинг рақобатбардошлигини ошириш, шунингдек, Туркиянинг етакчи фармацевтика компаниялари билан ўзаро ҳамкорлик алоқаларини кенгайтириш мақсадида амалга оширилди.

Хизмат сафари доирасида делегация аъзолари Туркиянинг илғор дори воситалари ва биологик фаол қўшимчалар ишлаб чиқарувчи корхоналари фаолияти билан яқиндан танишиб, ишлаб чиқариш жараёнлари, сифат назорати тизимлари, инновацион технологиялар ҳамда экспортга йўналтирилган фаолият тажрибасини ўрганиш имкониятига эга бўлдилар.

Ташриф давомида делегация TOBB (Türkiye Odalar ve Borsalar Birliği) томонидан ташкил этилган Туркия дори саноати кенгаши йиғилишида иштирок этди. Унда Туркия фармацевтика бозорининг ривожланиш тенденциялари, ишлаб чиқариш ва экспорт масалалари, шунингдек, ўзаро ҳамкорлик истиқболлари муҳокама қилинди.

Шундан сўнг делегация аъзолари Abdi İbrahim İlaç San. A.Ş., Berko İlaç ve Kimya Sanayi A.Ş., Atabay Kimya, Humanis Sağlık (Pharmactive), Koçak Farma ҳамда Unirex компанияларига ташриф буюриб, замонавий ишлаб чиқариш жараёнлари, сифатни таъминлаш тизимлари ва экспортга йўналтирилган фаолият тажрибаси билан танишдилар.