Тошкент, Ўзбекистон (UzDaily.uz) — Ўзбекистон элчиси (қароргоҳи Будапешт шаҳрида жойлашган) Ойбек Шахавдинов Словенияга ташрифи давомида ушбу мамлакат парламенти ва бир қатор давлат ташкилотлари раҳбарлари билан учрашувлар ўтказди, деб хабар қилмоқда "Дунё" АА мухбири.

Хусусан, мамлакатимиз дипломатик миссияси раҳбарининг Словения Миллий парламенти раиси ўринбосари Даниэль Кривец, Парламентнинг ташқи сиёсат масалалари бўйича қўмита раиси Предраг Бакович, Ташқи ишлар ва Европа ишлари вазирлиги Иқтисодий ва ижтимоий дипломатия дирекцияси бош директори Слободан Шешум, Савдо-саноат палатаси, "Spirit Slovenia" бизнесни ривожлантириш агентлиги директори ўринбосари Тамара Заец Балажич, шунингдек, "Slovenian Global Action" гуманитар ташкилоти президенти Роберт Крижанич билан музокаралари бўлиб ўтди.

Учрашувлар чоғида Ўзбекистон-Словения парламентлараро мулоқотини янада мустаҳкамлаш, Савдо-иқтисодий ҳамкорлик бўйича Ўзбекистон-Словения ҳукуматлараро қўшма комиссиясининг биринчи йиғилишини ташкил этиш ва икки томонлама ҳамкорликнинг бошқа истиқболли йўналишларига оид масалалар муҳокама қилинди.

Ташриф давомида Словения Савдо-саноат палатаси билан ҳамкорликда Ўзбекистоннинг савдо ва инвестициявий салоҳиятига бағишланган давра суҳбати ташкил этилди.

Унда икки мамлакат ўртасидаги савдо-иқтисодий алоқаларни фаоллаштириш бўйича кейинги қадамлар хусусида фикр алмашилди. Словениялик инвесторлар Ўзбекистон иқтисодиётининг муҳим тармоқларига сармоя киритишга чақирилди.