Тошкент, Ўзбекистон (UzDaily.uz) —  Ўзбекистон Савдо-саноат палатаси бошчилигида 60 нафардан ортиқ ишбилармон вакиллари Саудия Арабистонининг Макка шаҳрида ўтказилаётган “Makkah Halal Forum 2025” халқаро тадбирида иштирок этмоқда.

Форум доирасида ташкил этилган халқаро кўргазмада 10 дан ортиқ давлатнинг миллий павилонлари ўз маҳсулот ва хизматларини намойиш этмоқда. Тадбирда 21 та Савдо-саноат палатаси раҳбарлари, 120 мамлакатдан 180 та компания вакиллари ҳамда 6 000 дан зиёд иштирокчи қатнашмоқда.

Ўзбекистон миллий павилони форумнинг энг фаол иштирокчиларидан бири бўлиб, унда мамлакатимизнинг 30 га яқин етакчи корхоналари ўз маҳсулот ва хизматларини тақдим этмоқда. Миллий павилонда озиқ-овқат саноати, қишлоқ хўжалиги, тўқимачилик, туризм, фармацевтика ва хизмат кўрсатиш соҳалари бўйича маҳсулотлар ва хизматлар намойиш этилмоқда.

Ўзбекистон компаниялари томонидан тақдим этилаётган маҳсулотлар форум иштирокчилари ўртасида катта қизиқиш уйғотмоқда. Кўргазма давомида бир қатор истиқболли шартномалар имзоланиши ва янги ҳамкорлик алоқалари ўрнатилиши кутилмоқда.

Форум доирасида Ўзбекистон делегацияси вакиллари бир қатор муҳим учрашувлар ўтказмоқда. Учрашувларда ҳалол маҳсулотлар экспортини кенгайтириш, сертификатлаш жараёнларини соддалаштириш, янги бозорларни ўзлаштириш ва инвестиция лойиҳаларини амалга ошириш каби масалалар муҳокама қилинмоқда.

Ушбу тадбир Ўзбекистон компаниялари учун халқаро бозорларга чиқиш, янги ҳамкорлар топиш, замонавий технологиялар билан танишиш, илғор тажрибаларни ўрганиш ва бевосита алоқалар ўрнатиш имкониятини яратмоқда.