Ўзбекистон чиқиндихоналар сонини қисқартирмоқда ва чиқиндиларни қайта ишлашни ривожлантирмоқда

Тошкент, Ўзбекистон (UzDaily.uz) — 2024 йилда Ўзбекистонда 27 та маиший чиқиндилар полигони рекультивация қилинди, деб хабар берди Чиқиндиларни бошқариш ва айланма иқтисодиётни ривожлантириш агентлиги матбуот хизмати.

Идора маълумотларига кўра, рекультивация жараёнида қайта ишлаб бўлмайдиган чиқиндилар тупроқ қатлами билан қопланиб, уларнинг атроф-муҳитга кейинги таъсирини олдини олади. Бундай ишлар Қорақалпоғистондан то Фарғона вилоятигача бўлган барча ҳудудларда амалга оширилди. Тикланган майдонларнинг умумий ҳажми ўнлаб гектарларни ташкил этди.

2025 йил охиригача яна 18 та полигонни, жами 80 гектардан ортиқ майдонни рекультивация қилиш режалаштирилган. Ҳозирги пайтда Агентлик ҳузуридаги Чиқиндилар полигонларини бошқариш дирекцияси балансида 185 та объект мавжуд.

Бундан ташқари, 2024 йил ва 2025 йилнинг ўтган даври мобайнида мамлакат бўйлаб 42 та чиқиндихона фаолияти тўхтатилди, тахминан 90 гектар ер майдони табиий экотизимларга қайтарилди.

Тадбирлар 2024 йил 4 январда қабул қилинган “Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида”ги Президент фармонига мувофиқ амалга оширилмоқда. Ҳужжат соҳани комплекс модернизация қилишни, хусусан ноқонуний чиқиндихоналарни йўқ қилиш, утилизациянинг янги технологияларини жорий этиш ва айланма иқтисодиёт тизимини ривожлантиришни назарда тутади.

Белгиланган мақсадли кўрсаткичларга мувофиқ, 2025 йилга келиб маиший чиқиндилар полигонлари сони камида 20 фоизга, 2030 йилга келиб эса икки баробарга қисқариши керак. Бўшаган ҳудудларда чиқиндиларни утилизация ва қайта ишлашга ихтисослашган саноат зоналарини яратиш режалаштирилган. Бу эса мамлакатнинг барқарор ривожланиши доирасида экологик ва иқтисодий мақсадларни уйғунлаштириш имконини беради.