Ўзбекистон 2025 йилнинг саккиз ойида олтин экспортини 69 фоизга оширди

Тошкент, Ўзбекистон (UzDaily.uz) — Ўзбекистон 2025 йил январь–август ойларида олтин экспортини сезиларли даражада оширди. Миллий статистика қўмитаси маълумотларига кўра, хорижга етказиб берилган олтин ҳажми 8,42 миллиард долларни ташкил қилиб, ўтган йилнинг шу даврига нисбатан 68,9 фоизга кўп бўлди.

Олтингнинг республика экспорти таркибидаги улуши 2024 йил январь–август ойларидаги 28,5 фоизга нисбатан 36,7 фоизга етди. Бу эса қимматбаҳо металнинг мамлакат ташқи савдо операцияларидаги етакчи ўрни сақланаётганини тасдиқлайди.

Умуман олганда, жорий йилнинг дастлабки саккиз ойида Ўзбекистон ташқи савдо айланмаси 51,4 миллиард долларни ташкил қилди ва ўтган йилнинг шу даврига нисбатан 19,8 фоизга ёки 8,49 миллиард долларга ошди.