Тошкент, Ўзбекистон (UzDaily.uz) — Бугун Ўзбекистон ва Уммон Савдо-саноат палаталари ўртасидаги ҳамкорлик масалаларига бағишланган онлайн учрашув бўлиб ўтди.

Учрашувда жорий йилнинг февраль ойи якунида ўзбекистонлик тадбиркор аёлларнинг Уммон Султонлигига ташрифи дастурлари муҳокама қилинди.

Муҳокамалар доирасида ўзбек каштачилик санъати усталарининг Маскат шаҳрида ўтказадиган маҳорат дарслари, тўқимачилик соҳаси вакиллари ҳамда дизайнерлар томонидан ташкил этилаётган мода намойишига оид ташкилий масалалар келишиб олинди.

Ташриф дастурида илк бор Ўзбек-Уммон тадбиркор аёллари бизнес-форумини ташкил этиш режалаштирилган бўлиб, унда икки мамлакат тадбиркорлари ўртасида иқтисодий ва инвестицион ҳамкорлик бўйича келишувларга эришиш кўзда тутилган.