Тошкент, Ўзбекистон (UzDaily.uz) — Атом энергияси агентлиги директори Азим Ахмедхаджаев бошчилигидаги делегация Хитой Халқ Республикасида ишчи ташриф билан бўлиб турибди. 25- апрелгача давом этадиган ташриф атом энергияси соҳасида халқаро ҳамкорликни мустаҳкамлаш ва Ўзбекистонда атом электр станцияси (АЭС) қурилиши лойиҳасини амалга оширишнинг асосий жиҳатларини муҳокама қилишга қаратилган.

Ташрифнинг интенсив дастури доирасида директор Азим Ахмедхаджаев Хитойнинг Экспорт-Импорт Банки (Эксимбанк) вакиллари билан музокаралар ўтказди. Учрашувда Ўзбекистонда АЭС қурилиши лойиҳаларини қўллаб-қувватлаш учун Хитойдан молиявий ресурсларни жалб қилиш истиқболлари муҳокама қилинди. Учрашувда Хитой томонидан Евроосиё минтақавий бўлими раҳбари Е Линжун ва Ўзбекистон билан ҳамкорлик йўналиши учун масъул Го Мо иштирок этдилар.

Бундан аввалроқ ташриф доирасида CNOS (CNNC) ва Shanghai Electric компанияси вакиллари билан учрашувлар бўлиб ўтган эди. Ушбу учрашувларда технологик ҳамкорлик масалалари ва атом энергияси соҳасидаги лойиҳаларни амалга оширишда иштирок этиш имкониятлари муҳокама қилинган эди.