Ноябр ойида Ўзбекистоннинг Жаҳон савдо ташкилотига қўшилиши бўйича Ишчи гуруҳ йиғилиши бўлиб ўтади

Тошкент, Ўзбекистон (UzDaily.uz) — Ўзбекистоннинг Жаҳон савдо ташкилоти (ЖСТ)га қўшилиши масалалари бўйича Ишчи гуруҳнинг ўн биринчи йиғилиши 2025 йил 5–6 ноябрь кунлари Женева шаҳрида бўлиб ўтади. Бу ҳақда Ўзбекистон Республикаси Президентининг ЖСТ масалалари бўйича махсус вакили Азизбек Урунов маълум қилди.

«Ўзбекистоннинг ЖСТга қўшилиши бўйича навбатдаги, 11-йиғилиш 5–6 ноябрь кунлари ташкилотнинг бош қароргоҳи — Женевада очиқ форматда ўтказилади», — деб ёзди Урунов ўзининг LinkedIn саҳифасида.

Унинг маълумотича, бу 2023 йилдан бери кетма-кет олтинчи учрашув бўлади. Илгари Ишчи гуруҳ йиғилишлари 2002, 2003, 2005, 2020 ва 2022 йилларда ўтган эди.

«Бу мамлакатнинг ЖСТга аъзо бўлиш жараёнидаги яна бир муҳим қадамдир. Ўзбекистоннинг саъй-ҳаракатларини қўллаб-қувватлаётган ташкилот аъзоларига миннатдорлик билдирамиз ва қолган масалаларни ҳал этишга тайёрмиз», — деб таъкидлади Урунов.

Ўзбекистон ЖСТга аъзо бўлиш жараёнини 2026 йилда Камерунда бўлиб ўтадиган 14-вазирлар конференциясигача якунлашни режалаштирмоқда.

Ҳозирги вақтда республика бозорга кириш бўйича 29 та битимни имзолаган ва яна икки давлат билан дастлабки келишувларга эришган. Икки томонлама музокараларни тўлиқ якунлаш учун яна учта давлат билан шартларни келишиш қолган.