Тошкент, Ўзбекистон (UzDaily.uz) — Мамлакатимиз саноатининг жадал ривожланиши баробарида аниқ ўлчашларга бўлган эҳтиёжнинг ортиб бориши натижасида метрология лабораторияларини доимий равишда такомиллаштириб бориш бугунги кунда долзарб вазифалардан бири ҳисобланади. 

Бу борада метрология йўналишида сўнгги 5 йилда республикамиздаги миллий эталонлар сони 3 баравар (9 тадан 29 тага) ошди, саноат тармоқларида ўлчаш воситаларини калибрлаш қамрови 78 фоизга етказилди ва хорижий давлатларда ўлчаш воситаларини калибрлашга сарфланадиган валюта миқдори 4 баравар қисқарди.

Ана шундай саъйи ҳаракатларнинг мантиқий давоми сифатида 2024 йилнинг 19 август куни Ўзбекистон теҳник жиҳатдан тартибга солиш агенлиги ва Саудия Арабистонининг «ACWA Power» компанияси ўртасида умумий қиймати $ 1,7 млн. АҚШ долларини ташкил этувчи инвестицион лойиҳа келишуви бўйича меморандум имзоланди. 

Ушбу меморандумдан асосий кўзланган мақсад, Қорақалпоғистон Республикасида қайта тикланувчи (шамол ва қуёш) электрстанцияларида қўлланиладиган ўлчаш воситаларини калибрлаш хизматларини жорий этишдир.

Мазкур йирик лойиҳани амалга ошириш мақсадида, «NOMAC» ва «Ўзбекистон миллий метрология институти» ўртасида ҳамкорлик шартномасини имзолаш маросими ўтказилди.

Бунинг натижасида, Ўзбекистон миллий метрология институтининг Қорақалпоғистон Республикаси филиали негизида юқори аниқликдаги замонавий ўлчаш воситалари билан жиҳозланган лабораториялар комплеки ташкил этилиши баробарида аҳолига сифатли хизмат кўрсатиш имконияти вужудга келади. Ҳозирда ушбу филиали учун халқаро тавсияларга асосан зарур инфратузилмага эга лабораториялар комплекси фойдаланишга топширилмоқда.

Маълумот учун, «ACWA Power» компанияси томонидан Оролбўйи минтақасида йилига 18,5 минг GW соатга яқин тоза энергия ишлаб чиқарувчи шамол электростанциялари қуриш режалаштирилган. Ушбу лойиҳа беш босқичда амалга оширилади, бу эса Ўзбекистоннинг тоза энергияга ўтиш стратегиясига эришиш йўлидаги муҳим қадам ҳисобланади.