Тошкент, Ўзбекистон (UzDaily.uz) — Олий Мажлис ҳузуридаги Нодавлат нотижорат ташкилотлари ва фуқаролик жамияти институтларини қўллаб-қувватлаш жамоат фонди директори Отабек Ҳусанов, Ўзбекистонда фаолият юритаётган нодавлат нотижорат ташкилотлари (ННТ) ҳамда хорижий грантлар олувчилари молиявий муаммоларга дуч келмаслигини маълум қилди.

Sevimli телеканалига берган интервьюсида у АҚШнинг янги маъмурияти томонидан хорижий ёрдамни вақтинчалик тўхтатиш ҳақидаги қарорга изоҳ бериб, бу айрим халқаро лойиҳаларга хавф солиши мумкинлигини қайд этди.

Илгари АҚШ халқаро ташаббусларни Давлат департаменти, АҚШнинг халқаро тараққиёт агентлиги (USAID), Пентагон, Қишлоқ хўжалиги вазирлиги ва бошқа тузилмалар орқали молиялаштириб келган.

"Ҳар доимгидек, биз ННТларни ҳар томонлама қўллаб-қувватлашга тайёрмиз. Лойиҳаларни давом эттириш учун барча зарурий шароитлар яратилади. Агар 2025 йилда хорижий грантлар билан боғлиқ муаммолар пайдо бўлса, уларни қўллаб-қувватлаш учун қўшимча механизмлар ишлаб чиқамиз. Шу муносабат билан барча ННТларни жамоат фонди томонидан эълон қилинаётган давлат грантлари ва ижтимоий буюртмалар танловларида фаол қатнашишга чақираман", — деди Ҳусанов.

Унинг таъкидлашича, фонд бюджети йилига тахминан 100 миллион долларни ташкил этади, шундан 70% маҳалла бошқарув тизимини молиялаштиришга йўналтирилади.

Айни пайтда, Дональд Трамп президентликка иккинчи марта киришганининг биринчи куниёқ 90 кунга хорижий ёрдамни вақтинчалик тўхтатиш ва унинг тамойилларини қайта кўриб чиқиш тўғрисида қарор қабул қилди.

Шунингдек, Трамп маъмурияти USAID фаолиятини вақтинчалик музлатиб қўйди ва агентликни маблағларни самарасиз сарфлашда айблади.