Тошкент, Ўзбекистон (UzDaily.uz) — Наманган шаҳри ҳокими Анвар Отахўжаев вилоят Ички ишлар бошқармаси Йўл ҳаракати хавфсизлиги бошқармаси бошлиғи Мансур Ғозиев номига мурожаатнома йўллаб, қонунга хилоф равишда ўрнатилган фото ва видео радарларни демонтаж қилишни сўради.

Ҳужжатда таъкидланишича, аҳоли билан учрашувлар давомида автоматик камералар томонидан қайд этилган йўл ҳаракати қоидалари бузилиши учун жазолардан норозилик билдириш ҳолатлари кўпаймоқда. Айниқса, айрим ушбу ускуналар меъёрий талабларга зид равишда — бинолар томида ва шаҳар ҳамда туман ободонлаштириш хизмати балансини ташкил этувчи кўча ёритиш устунларига ўрнатилгани қайд этилган.

«Бундай камералар орқали қоидалар бузилишини қайд этиш наманганликларга нафақат моддий, балки маънавий зарар ҳам етказмоқда», — дейилади мурожаатда.

Анвар Отахўжаев Наманган шаҳри, Давлатобод ва Янги Наманган туманларида ўрнатилган бундай камераларни тизимдан чиқаришни, улар орқали жарима қўллашни тўхтатишни ва бу ускуналардан фақат йўл ҳаракати хавфсизлигини таъминлаш мақсадида фойдаланишни таклиф этди.