Наманган эркин иқтисодий зонаси Жаҳон эркин зоналар ташкилоти аъзосига айланди

Тошкент, Ўзбекистон (UzDaily.uz) — Наманган вилоятининг инвестицион жозибадорлигини ошириш, халқаро иқтисодий алоқаларни кенгайтириш борасида амалга оширилаётган ишлар ўз самарасини бермоқда.

Хусусан, Наманган эркин иқтисодий зонаси 2026 йил учун дунёдаги нуфузли халқаро тузилмалардан бири — Жаҳон эркин зоналар ташкилоти (World Free Zones Organization)нинг овоз бериш ҳуқуқига эга аъзоси сифатида қабул қилинди.

Мазкур ташкилот томонидан Наманган эркин иқтисодий зонасига аъзолик сертификати тақдим этилди. Унга кўра, зона 2026 календарь йили учун расман ташкилотнинг тўлақонли иштирокчиси сифатида эътироф этилди.

Жаҳон эркин зоналар ташкилотига аъзолик Наманган эркин иқтисодий зонаси учун бир қатор муҳим имкониятларни яратади. Жумладан:

- халқаро инвесторлар билан ҳамкорликни янада кучайтириш;

- илғор тажрибаларни ўрганиш ва жорий этиш;

- экспорт салоҳиятини ошириш;

- глобал иқтисодий тармоқларда фаол иштирок этиш имконияти кенгаяди.

Бу эса ўз навбатида, Наманган вилоятида янги инвестиция лойиҳаларини амалга ошириш, иш ўринлари яратиш ва ҳудуд иқтисодиётини янада ривожлантиришга хизмат қилади.

Мазкур ютуқ Наманган вилоятида амалга оширилаётган очиқлик, инвестицияларга қулай муҳит яратиш ва халқаро ҳамкорликни мустаҳкамлашга қаратилган ислоҳотларнинг яна бир амалий натижаси сифатида баҳоланмоқда.