Тошкент, Ўзбекистон (UzDaily.uz) — Иқтисодиёт ва молия вазирлиги биносида Германиянинг Азот кислотаси бўйича иқлим ҳаракати гуруҳи (NACAG) котибияти раҳбари Торстен Брезина бошчилигидаги делегация ҳамда Яшил иқтисодиётга ўтиш ва ривожлантиришни мувофиқлаштириш бошқармаси вакиллари ўртасида Ўзбекистонда азот кислотаси чиқиндиларини қисқартириш лойиҳаси доирасида амалга оширилётган ишлар жараёни ва келгусидаги режаларни муҳокама қилиш бўйича учрашув бўлиб ўтди.

Азот кислотаси бўйича иқлим ҳаракати гуруҳи (Nitric Acid Climate Action Group — NACAG) Германия федерал ҳукуматининг азот кислота ишлаб чиқариш жараёнида азот оксиди (N2О) чиқиндиларини камайтиришга қаратилган ташаббусидир. NACAG 2015 йилда бўлиб ўтган Париж иқлим конференцияси доирасида ташкил этилган бўлиб, Германия халқаро ҳамкорлик жамияти (Деутсче Геселлсчафт фüр Интернатионале Зусамменарбеит — GIZ) кўмагида фаолият олиб боради.

Учрашув давомида NACAG вакиллари томонидан республика саноат корхоналарида азот кислота ишлаб чиқариш жараёнида юзага келадиган азот оксиди чиқиндиларини камайтириш ҳамда лойиҳа доирасида олиб борилаётган ва келгусида режалаштирилган ишлар бўйича қисқача маълумотлар берилди.

Хорижий томон Ўзбекистонда азот кислота ишлаб чиқариш жараёнида азот оксиди чиқиндиларини назорат қилиш бўйича узоқ муддатли чора-тадбирлар ишлаб чиқишда ва секторни иқлим ўзгариши бўйича миллий режаларга интеграция қилишда ҳамда азот кислота ишлаб чиқарадиган саноат корхоналарида чиқиндиларни камайтириш технологияларини (беғараз кўмак асосида) ўрнатиш, улардан фойдаланиш ва азот оксиди чиқиндиларини назорат қилиш мосламаларини жорий этишда қўллаб-қувватлашга тайёрлигини билдирди.

Учрашув сўнгида ўзаро ҳамкорликни янада жадаллаштиришга келишиб олинди.