Москвада Россиядан Ўзбекистонга туризмни ривожлантириш масалалари муҳокама қилинди

Тошкент, Ўзбекистон (UzDaily.uz) — 2026 йил 11–13 март кунлари Москва шаҳрида бўлиб ўтган “MITT – International Travel & Hospitality Show 2026” халқаро туризм кўргазмаси доирасида Ўзбекистон Республикаси Туризм қўмитаси раиси ўринбосари С. Таджиев ва Россия Федерацияси туризм бозорида фаолият юритаётган хусусий сектор вакиллари ўртасида учрашув бўлиб ўтди. 

Учрашувда туризм соҳасидаги мавжуд вазият, халқаро бозордаги ўзгаришлар ҳамда Россиядан Ўзбекистонга туристлар оқимини янада ошириш масалалари муҳокама қилинди. Хусусан, иштирокчилар Яқин Шарқ минтақасидаги геосиёсий вазият ва бу ҳолатнинг туристик йўналишларга таъсири ҳақида фикр алмашдилар.

Мутахассислар қайд этишича, бугунги кунда талабнинг маълум даражада қайта тақсимланиши кузатилмоқда ва россиялик туристлар айрим ҳолларда ўз саёҳатларини Жануби-Шарқий Осиё давлатларига йўналтирмоқда. 

Шу билан бирга, туроператорлар таҳлилларига кўра, минтақадаги беқарорлик Марказий Осиё давлатлари, жумладан Ўзбекистон учун хавфсиз ва қулай туристик йўналиш сифатида ўз позициясини мустаҳкамлаш имкониятини ҳам яратмоқда. Бу эса транзит туристик оқимларни жалб қилиш ҳамда Россия бозори билан ҳамкорликни янада кенгайтириш учун қўшимча имкониятлар очиши мумкин. 

Мулоқот давомида хусусий сектор вакиллари россиялик туристларни жалб қилишни рағбатлантиришга қаратилган қатор амалий таклиф ва тавсияларни илгари сурдилар. Улар орасида икки давлат ўртасида тўлов тизимларини янада қулайлаштириш, авиақатновлар жадвалини оптималлаштириш ва кундузги рейслар сонини ошириш, шунингдек Россия бозорига мослаштирилган махсус маркетинг дастурларини ишлаб чиқиш масалалари алоҳида таъкидланди. 

Шунингдек, Россиянинг айрим ҳудудларида Ўзбекистоннинг диний ва зиёрат туризми салоҳиятини фаол тарғиб қилиш, мамлакатдаги туристик маҳсулотлар турини кенгайтириш, жумладан тиббий, саноат ва ёшлар туризми каби янги йўналишларни ривожлантириш зарурлиги қайд этилди. Мутахассислар, шунингдек, Россия бозорида тарғибот ишларини ушбу мамлакатда оммалашган рақамли платформалар орқали амалга ошириш мақсадга мувофиқлигини ҳам билдирдилар. 

Тадбир якунида туроператорлар томонидан билдирилишича, 2026 йилда халқаро туризм бозоридаги ижобий динамика сақланиб қолиши ва барча асосий бозорлардан, жумладан Россия Федерациясидан Ўзбекистонга туристлар оқими тахминан 20 фоизга ўсиши кутилмоқда.