Москвада ўзбек ишлаб чиқарувчилари учун «Садовод» савдо майдончаси очилди

Тошкент, Ўзбекистон (UzDaily.uz) — Москва шаҳрида Россиянинг энг йирик савдо мажмуаларидан бири - «Садовод»да ўзбекистонлик ишлаб чиқарувчилар учун савдо майдончасининг расмий очилиш маросими бўлиб ўтди.

Лойиҳа Ўзбекистон Республикаси Инвестициялар, саноат ва савдо вазирлиги ҳамда Енгил саноатни ривожлантириш агентлиги кўмагида миллий брендларни Россия бозорида илгари суриш мақсадида амалга оширилди. Тадбирда Агентлик директори Нозим Холмурадов ва ИССВ департаменти раҳбари Иномжон Абдураҳмонов иштирок этдилар.

Текстиль, оёқ-кийим ва тикувчилик соҳасидаги маҳаллий корхоналар учун савдо шохобчалари ва омбор жойлари марказлаштирилган тарзда ижарага олинди. Майдонда 38 та савдо нуқтаси фаолият юритмоқда, унда ўзбекистонлик компаниялар кийим-кечак, оёқ-кийим, уй тўқимачилиги ва аксессуарлар каби маҳсулотларини фаол намойиш этмоқда.

Янги савдо майдончаси тўғридан-тўғри савдоларни йўлга қўйиш, россиялик ҳамкорлар билан шартномалар тузиш ва миллий брендларимизнинг мамлакатдаги энг йирик истеъмол бозорида ўз мавқеини мустаҳкамлаш учун кенг имкониятлар яратади.