Тошкент, Ўзбекистон (UzDaily.uz) — Фармацевтика маҳсулотлари хавфсизлиги маркази директори ўринбосари Нозим Бердиев бошчилигидаги делегация Молдовага ташриф доирасида Agentia Medicamentului si Dispozitivelor Medicale – Молдова Дори воситалари ва тиббий буюмлар агентлиги раҳбари Драгош Гуцу билан учрашди.

Учрашувда икки мамлакат ўртасида фармацевтика соҳасидаги ҳамкорликни ривожлантириш, дори воситалари ва тиббий буюмларнинг хавфсизлигини таъминлаш, шунингдек, ўзаро тажриба алмашиш масалалари муҳокама қилинди.

Молдова Дори воситалари ва тиббий буюмлар агентлиги (Agentia Medicamentului si Dispozitivelor Medicale) 2007 йилда ташкил топган бўлиб, мамлакатда дори воситалари ва тиббий буюмларни рўйхатдан ўтказиш ва тартибга солиш, шунингдек, хавфсизлик ва сифат назоратини амалга оширувчи давлат органи ҳисобланади.

Якунда, икки мамлакат фармацевтика соҳасидаги илғор тажрибаларни ўрганиш ва уларни миллий тизимларга жорий этиш бўйича англашув меморандуми имзоланди. Ушбу келишув икки давлат ўртасида фармацевтика соҳасидаги ҳамкорликни янада мустаҳкамлашга, илмий ва техник тараққиётни қўллаб-қувватлашга хизмат қилади.