Тошкент, Ўзбекистон (UzDaily.uz) — Юртимиз элчихонаси кўмагида жорий йилнинг 13-15 июль кунлари Ўзбекистоннинг "Propharm partners" ва "Lafz" компаниялари раҳбарларининг Мисрга амалий сафари ташкил этилди, деб хабар қилмоқда "Дунё" АА мухбири.

Таъкидлаш жоизки, сўнгги йилларда Ўзбекистон – Миср ҳамкорлиги барча соҳаларда фаол ривожланиб бормоқда. Шуниндек, Ўзбекистоннинг Мисрдаги элчихонаси томонидан мамлакатимиздаги истиқболли фармацевтика йўналишидаги инвестицион лойиҳаларга ихтисослашган Миср компанияларини жалб этиш ва соҳага янги технологияларни йўналтиришга алоҳида эътибор қаратилмоқда.

"Propharm partners" ва "Lafz" компаниялари раҳбарларининг амалий сафари ҳам анашу мақсадда амалга оширилди.

Сафар давомида бир қатор учрашув ва музокаралар ўтказилди. Жумладан, Мисрнинг "ACDIMA" холдинги раҳбарлари билан кечган мулоқот натижасида фармацевтика маҳсулотларини ҳамкорликда мамлакатимизда ишлаб чиқаришни маҳаллийлаштириш бўйича битим имзоланди. Томонлар лойиҳани амалга ошириш муддатлари ва механизмларини келишиб олдилар.

Шунингдек, музокаралар давомида ушбу холдинг таркибига кирувчи "EIPICO", "MUP" (Medical Union Pharmaceuticals), "October pharma" компаниялари билан фармацевтика маҳсулотларини етказиб бериш бўйича дистрибьюторлик шартномалари имзоланди.

Имзоланган битимлар Миср компаниялари томонидан ишлаб чиқарилаётган юқори сифатли, халқимиз эҳтиёжи учун зарур ва ҳамёнбоб дори воситаларини мамлакатимизга олиб кириш ва кейинчалик маҳаллийлаштиришни назарда тутади.

"ACDIMA" холдинги 1200 дан ортиқ турдаги маҳсулотлар ишлаб чиқарувчи 17 та фармацевтика компаниясини бирлаштириб, саноатнинг кенг соҳаларини қамраб олади.