«Металлург» футбол клуби Ўзбекистонда фаолиятини қайта тиклади

Тошкент, Ўзбекистон (UzDaily.uz) — Мамлакатнинг энг қадимги профессионал жамоаларидан бири бўлган Металлург футбол клуби Ўзбекистонда фаолиятини қайта тиклади.

Қайта ташкил этилган «Металлург» клуби фаолиятида нафақат Ўзбекистон балки халқаро майдонда танилган истеъдодли футболчилар етишиб чиқиши кўзда тутилган. Шу билан бирга, жамоа таркибида стратегик ривожланиш, легионер футболчилар билан ишлаш ва спорт инфратузилмасини янада кучайтириш бўйича аниқ режалар ишлаб чиқилган.

Тадбир якунида «Металлург» мухлислари ва жамоа ходимларига янги давр бошлангани, профессионал муҳит ва келажакдаги ютуқларга тайёргарлик кўрилгани тақдим этилди. Клубнинг қайта ташкил этилиши нафақат натижа, балки илҳом ва профессионал қадриятларни тарғиб қилишга хизмат қилиши таъкидланди.

Маълумот учун, «Металлург» футбол клуби 1945‑йилда ташкил этилган бўлиб, Ўзбекистон футболида кўп йиллик тарих ва тажрибани мужассам этган профессионал жамоа ҳисобланади. Клуб йиллар давомида Суперлига ва биринчи лига мусобақаларида иштирок этиб, Бекобод шаҳрининг спорт маданиятида муҳим ўрин эгаллади. 2002‑йилда Суперлигада қўлга киритилган бешинчи ўрин жамоанинг энг барқарор ва самарали даврларидан бири сифатида тарихга кириб қолди.

«Металлург» нафақат ўз мухлислари орасида, балки бутун мамлакат футбол жамоатчилиги орасида ҳурмат қозонди ва кўплаб ёш футболчиларни етиштиришга ҳисса қўшди. Сўнгги йилларда юзага келган ташкилий ва молиявий ҳолатлар туфайли клуб фаолияти вақтинча тўхтатилди. Шу билан бирга, «Металлург» номи, унинг тарихи ва анъаналари ўз аҳамиятини йўқотмади ҳамда жамоани қайта тиклаш зарурати жиддий мавзу сифатида сақланиб қолди.