Меҳнат қонунчилиги такомиллаштирилмоқда

Тошкент, Ўзбекистон (UzDaily.uz) — Бир гуруҳ депутатлар томонидан қонунчилик ташаббуси ҳуқуқи асосида ишлаб чиқилган — “Ўзбекистон Республикасининг Меҳнат кодексига ўзгартиришлар киритиш тўғрисида”ги қонун лойиҳаси биринчи ўқишда концептуал жиҳатдан кўриб чиқилди.

Мамлакатимизда фуқароларнинг меҳнат ҳуқуқлари кафолатларини таъминлашга алоҳида эътибор қаратилиб, бу борада бир қатор ишлар амалга оширилмоқда.

Шу билан бирга, айрим ташкилотларнинг Қонунчилик палатасига йўллаган мурожаатлари ва депутатлар томонидан жойларда ўтказилган учрашувлар таҳлили Меҳнат кодексининг 186- ва 398-моддаларида белгиланган нормаларни амалиётда қўллашда баҳсли ҳолатлар юзага келаётганини кўрсатмоқда.

Хусусан, тўлиқсиз иш вақтини “тиббий хулоса”га асосан бериш талаби фақат оиланинг бетоб аъзосини парваришлашни амалга ошираётган шахсга татбиқ этилиши лозим бўлса-да, ушбу хатбошидаги барча тоифадаги шахсларга татбиқ этилиши тушунилмоқда.

Натижада, бугунги кунда корхона ва ташкилотлар амалиётида амалдаги ушбу моддаларни қўллашда ҳомиладор аёлга, ўн тўрт ёшга тўлмаган боланинг (ўн олти ёшга тўлмаган ногиронлиги бўлган боланинг) ота-онасидан бирига тўлиқсиз иш вақтини белгилашда улардан тиббий хулоса талаб қилишга, бу эса турли хил оворагарчиликларга олиб келмоқда.

Қонун лойиҳаси билан Меҳнат кодексининг 398-моддасига тўлиқсиз иш вақтини “тиббий хулоса”га асосан бериш талаби фақат оиланинг бетоб аъзосини парваришлашни амалга ошираётган шахсга татбиқ этишни назарда тутувчи ўзгартиришлар киритилмоқда. Шу муносабат билан ушбу кодекснинг 186-моддаси иккинчи қисмининг иккинчи хатбошидаги такрорловчи норма чиқарилиб, 398-моддага ҳавола кўрсатиш таклиф этилмоқда.

Мажлисда қонун лойиҳаси Меҳнат кодексининг нормалари амалиётда тўғри қўлланилишини таъминлашга қаратилгани қайд этилди.

Депутатлар томонидан бир қатор саволлар кўтарилди. Савол-жавоблардан сўнг, қонун лойиҳаси иккинчи ўқишда қабул қилинди.