Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари Дилшод Расулов ва туркиялик дизайнер-технолог Гюркан Курун ўртасида учрашув бўлиб ўтди. Шунингдек, учрашувда "Мебель ва ёғочсозлик саноати" уюшмаси раиси ўринбосари Азиз Эгамбердиев ҳам иштирок этди.

Учрашув давомида томонлар 6 ойдан 12 ойгача бўлган муддатда Ўзбекистон мебель саноатига туркиялик юқори малакали мутахассисни жалб қилиш имкониятларини муҳокама қилдилар. Бу жараён билан боғлиқ барча харажатлар "Савдони ривожлантириш компанияси" АЖ томонидан қопланиши таъкидланди.

Гюркан Курун ҳамкорлик дастури доирасида 14-15 март кунлари Хоразм вилоятининг Хонқа туманидаги Кичик мебель саноат зонасида мебель саноати соҳасида фаолият юритувчи тадбиркорлар учун махсус семинар-тренинг ўтказди.

Семинар иштирокчилари мебель дизайнидаги замонавий тенденциялар, инновацион материаллар ва ишлаб чиқариш жараёнларини оптималлаштириш усуллари ҳақида қимматли билимларга эга бўлдилар.

Учрашув натижасида "Мебель ва ёғочсозлик саноати" уюшмаси, "Савдони ривожлантириш компанияси" АЖ ва туркиялик мутахассис Гюркан Курун ўртасида Ўзбекистон мебель саноати соҳасидаги компанияларни ўқитиш мақсадида шартнома имзоланди.

Ушбу келишув нафақат маҳаллий мутахассисларнинг касбий даражасини оширади, балки илғор технологияларни жорий этишга ҳам ёрдам беради. Бу эса келажакда ўзбек мебель маҳсулотларини янги экспорт бозорларига олиб чиқиш имкониятини яратади.