Маст ҳолда жанжал қилган шахс Тошкентда ИИБ ходимларидан узр сўради

Тошкент, Ўзбекистон (UzDaily.uz) — Тошкент шаҳрида патруль-пост хизмати ходимларига ҳужум қилганидан сўнг қўлга олинган фуқаро Пардаев қилган ишидан омма олдида пушаймон эканини билдириб, жабрланганлардан узр сўради.

Иш ҳолатларига кўра, ҳуқуқбузар давлат рақам белгилари ечилган ҳолда маст аҳволда автомобил бошқарган, тақиқловчи светофор сигналига қарамай ҳаракатланган ва йўл-транспорт ҳодисасини келтириб чиқарган.

Уни қўлга олишга уриниш пайтида у патруль-пост хизмати ходимларига қаршилик кўрсатган ва улардан бирига мушт билан зарба берган.

Қўлга олинганидан сўнг эркак узр сўраб мурожаат қилди. «Алкоголь истеъмоли туфайли ўзимни назорат қила олмадим. Ходимга қўл кўтардим. Содир бўлган воқеадан чуқур афсусдаман ва узр сўрайман. Менинг аҳмоқлигим шундай оқибатларга олиб келди», — деди у.

Шунингдек, у бошқаларни алкогол истеъмол қилишдан эҳтиёт бўлишга чақириб, унинг рулдаги ҳаракатлари атрофдагилар учун анча оғир оқибатларга олиб келиши мумкинлигини тан олди.

Алоҳида таъкидлашича, унинг ҳаракати ички ишлар органларида йиллар давомида фаолият юритиб келган акаси — подполковник Шерзод Пардаевнинг обрўсига путур етказган. Вазирлик буйруғига мувофиқ, у ҳодисадан сўнг Сирдарё вилояти ИИБдаги раҳбарлик лавозимидан озод этилган.

Яшнобод тумани прокуратураси томонидан фуқаро Пардаевга нисбатан Ўзбекистон Республикаси Жиноят кодексининг 219-моддаси 2-қисми ва 277-моддаси «г» банди 3-қисми бўйича жиноят иши қўзғатилган.

Унга нисбатан эҳтиёт чораси сифатида қамоққа олиш қўлланилди. Тергов ҳаракатлари давом этмоқда.