Тошкент, Ўзбекистон (UzDaily.uz) — Яқин кунларда Ўзбекистон Савдо-саноат палатаси бошчилигида ўзбекистонлик тадбиркор аёлларнинг Ўмон Султонлигига ташрифи амалга оширилади.

Мазкур ташриф олдидан, 18 февраль куни Ўзбекистон Савдо-саноат палатасида тадбиркор аёлларнинг Ўмон Султонлигининг Ўзбекистондаги Фавқулодда ва Мухтор Элчиси Вафо Жабр Носир ал-Бусаидий билан учрашуви ташкил этилди.

Суҳбат чоғида тадбиркор аёллар ташрифдан кўзланган мақсадлар, кутилаётган натижалар ва бўлажак ҳамкорлик масалалари ҳақида фикр алмашдилар.

Ўз навбатида Ўмон элчиси Ўзбекистон Республикаси Президентининг хотин-қизлар тадбиркорлигини қўллаб-қувватлашга қаратаётган эътибори ва бу борада олиб борилаётган ислоҳотларни юқори баҳолаб, икки давлат ўртасидаги ҳамкорликда айнан аёллар ташаббуслари муҳим ўрин тутишини таъкидлади.

Ўзбекистондаги илк фаолиятимни бошлаганимда, юрагимнинг тубидан икки давлатдаги аёллар тадбиркорлигини ривожлантиришга алоҳида эътибор қаратишни ният қилгандим. Шу сабабли бу ташрифдан жуда мамнунман — деди Вафо ал-Бусаидий.

Учрашув натижаларига кўра, ташрифни юқори савияда ташкил этиш ва ўтказиш бўйича режали ишларни ҳамкорликда давом эттиришга келишиб олинди.