Тошкент, Ўзбекистон (UzDaily.uz) — Ўзбекистон Савдо-саноат палатаси бошчилигидаги аёл тадбиркорларнинг Ўмон Султонлигига ташрифи доирасида Ўзбекистон-Ўмон бизнес форуми бўлиб ўтди. Унда икки давлатнинг 100 дан ортиқ ишбилармон доиралари вакиллари иштирок этди.

Форумни Ўмон Султонлиги Савдо-саноат палатасининг хотин-қизлар уюшмаси раҳбари Сиҳам Ал-Ҳарти, Ўзбекистон Савдо-саноат палатаси раиси ўринбосари Нодира Шотурсунова, Ўзбекистоннинг Ўмон Султонлигидаги элчиси Абдусалом Хатамов ўз нутқлари билан очиб беришди.

Форум давомида иштирокчиларга икки мамлакатда амалга оширилаётган ислоҳотлар, тадбиркорлик фаолияти учун яратилган қулай шароитлар, Ўзбекистон ва Ўмоннинг инвестициявий ва экспорт салоҳияти ҳақида атрофлича маълумотлар берилди.

Мазкур тадбир ўзаро савдо-иқтисодий алоқаларни мустаҳкамлаш, ҳамкорлик истиқболларини муҳокама қилиш ва қўшма лойиҳаларни амалга ошириш учун муҳим платформага айланди.

Форум якунлари бўйича, Ўзбекистон ҳамда Ўмон ишбилармон доира вакиллари ўртасида В2В форматидаги икки томонлама учрашувлар ўтказилиб, ҳамкорликни ривожлантиришга қаратилган қатор келишувларга эришилди.