Тошкент, Ўзбекистон (UzDaily.uz) — Остонада Марказий Осиё мамлакатлари ва Хитой транспорт вазирларининг иккинчи учрашуви бўлиб ўтди.

Учрашувда Қозоғистон Республикаси транспорт вазири Марат Карабаев, Хитой Халқ Республикаси транспорт вазири Лю Вей, Қирғизистон Республикаси транспорт ва коммуникациялар вазири Абсаттар Сирғабаев, Тожикистон Республикаси транспорт вазири Азим Иброҳим, Туркманистон Вазирлар Маҳкамаси ҳузуридаги Транспорт ва коммуникациялар агентлиги бош директори Мамметхан Чакиев ва Ўзбекистон Республикаси транспорт вазирининг биринчи ўринбосари Маманбий Омаров бошчилигидаги беш мамлакат делегациялари иштирок этишди.

Вазирлар минтақада ва жаҳонда транспорт соҳасидаги мавжуд вазият юзасидан фикр алмашиб, Хитой ва Марказий Осиё давлатлари ўртасидаги иқтисодий, савдо ва гуманитар ҳамкорликнинг бутун салоҳиятидан фойдаланишнинг кенг кўламли масалаларини муҳокама этишди.

Олти томонлама учрашув доирасида транспорт идоралари раҳбарлари Марказий Осиё мамлакатлари ва Хитой ўртасида транспорт соҳасида кўп томонлама ҳамкорлик дастурини яратиш зарурлигини таъкидладилар.

Ушбу дастур электрон ҳужжат айланишини ва юклар ҳаракатини онлайн режимда кузатиш имкониятини таъминлайди. Вазирлар халқаро автомобиль ташувларини соддалаштириш ва хорижий рухсатнома бланкаларини (ХРБ) алмашиш механизмини электрон шаклга ўтказишга интилмоқдалар.

Учрашувда вазирлар иккита ҳужжатни имзоладилар: халқаро автомобиль ташувларини амалга оширишда рақамлаштириш соҳасида ҳамкорлик тўғрисида англашув меморандуми ҳамда транспорт идоралари ўртасида англашув меморандуми.

Шунингдек, томонлар автомобиль ва темир йўл ташувларини амалга оширишда Хитой ва Марказий Осиё давлатлари ўртасидаги ўтказиш пунктларини кесиб ўтиш тартибини соддалаштириш зарурлиги тўғрисида умумий фикрга келишдилар.

Транспорт идоралари раҳбарлари профессионал кадрлар тайёрлаш соҳасидаги ҳамкорликни мустаҳкамлашни ва илмий-тадқиқот ҳамда таҳлилий марказлар ўртасида ҳамкорлик механизмини ўрнатиш имкониятини кўриб чиқиш муҳимлигини қайд этишди. 

Шунингдек, халқаро транспорт лойиҳаларини амалга ошириш учун илмий қўллаб-қувватлашни таъминлаш мақсадида транспорт таълими соҳасида ҳамкорлик қилиш зарурлигини таъкидладилар.