Тошкент, Ўзбекистон (UzDaily.uz) — Мансур Ғозиев Андижон вилояти ички ишлар бошқармаси бошлиғи ўринбосари — жамоат хавфсизлиги хизмати бошлиғи лавозимига тайинланди. Бу ҳақда Kun.uz нашри хабар берди.

Янги тайинловга қадар у Наманган вилояти ИИБ Йўл ҳаракати хавфсизлиги бошқармаси бошлиғи вазифасида ишлаб келган. Манба маълумотига кўра, Ғозиев икки кун олдин янги лавозимда фаолиятини бошлаган.

У оммавий ахборот воситаларида Наманган шаҳри ҳокими Анвар Отахўжаев билан радарлар ўрнатилишига оид мурожаатлари асосида юзага келган ҳолат орқали кенг танилган. Қайд этилишича, шаҳар ҳокимлиги аҳоли норозилигига сабаб бўлган талабларга жавоб бермайдиган радарларни демонтаж қилишни сўраб расмий хат юборган.

Жавоб тариқасида Ғозиев хат йўллаб, 2024–2025 йиллар давомида шаҳар ҳокимиятига тегишли хизмат автомашинаси 47 марта йўл ҳаракати қоидаларини бузганини қайд этган.