«Манчестер Сити» Artel Electronics билан ҳамкорликни эълон қилди

Тошкент, Ўзбекистон (UzDaily.uz) — «Манчестер Сити» бугун Марказий Осиёдаги маиший электроника ишлаб чиқарувчилар орасида энг йирик компания ҳисобланган Artel Electronics билан ҳамкорлик шартномасини имзолади. Компания портфелига Artel, Shivaki ва Avalon брендлари киради.

Янги келишувга мувофиқ, Artel Electronics клубнинг Расмий минтақавий ҳамкори, шунингдек, Ўзбекистон ва минтақанинг бошқа муҳим мамлакатларида «Манчестер Сити»нинг эксклюзив телевизор ҳамкорига айланади. Бу клуб тарихида Марказий Осиёдаги илк ҳамкорлик бўлиб, Англия Премьер-лигаси клуби биринчи марта ўзбек бренди билан тижорат келишуви тузиши ҳисобланади.

Ушбу ҳамкорлик Ўзбекистон футболи учун муҳим паллага тўғри келмоқда: мамлакат тарихда илк бор FIFA Жаҳон чемпионатига йўлланма олди ва маҳаллий иқтидорлар майдонга чиқа бошлади. Ҳамкорлик тез суръатларда ривожланаётган Ўзбекистон футбол бозорини қўллаб-қувватлаш, шунингдек, клуб билан минтақа ўртасидаги алоқаларни мустаҳкамлашга қаратилган.

Мухлисларни клуб билан ўзаро алоқаларни кучайтиришга қаратилган қўшма кампаниялар, промо-акциялар, рақамли контент ва бошқа фаолиятлар орқали янги имкониятлар кутмоқда.

City Football Group’нинг глобал ҳамкорлик савдоси бўйича вице-президенти Кейтлин Бил шундай деди: «Artel Electronics билан янги минтақавий ҳамкорликни эълон қилишдан мамнунмиз. Ўзбекистон ва Марказий Осиёда клубга бўлган қизиқиш тобора ортиб бормоқда ва ушбу келишув минтақадаги мавқеимизни янада мустаҳкамлайди».

Artel Electronics маркетинг бўлими раҳбари Нодир Ҳикматиллаев эса қуйидагиларни таъкидлади: «“Манчестер Сити” билан ҳамкорлик мамлакатимиз учун янги даврни ифодалайди. Биз биргаликда жаҳон даражасидаги футболни Ўзбекистон ва Марказий Осиё бўйлаб мухлислар уйларига олиб киришни, келажак авлод иқтидорларини руҳлантиришни ва Янги Ўзбекистон брендлари жаҳон майдонида нималарга қодир эканини намоён этишни истаймиз».