Тошкент, Ўзбекистон (UzDaily.uz) — Ўзбекистон элчиси Каромиддин Гадоев Малайзиянинг Селангор штати Раса шаҳарчасида жойлашган Зурах саноат паркига ташриф буюриб, "SMH Rail" компанияси раиси ва бошқарув директори Куппусами Нараянасами билан учрашди, деб хабар қилмоқда "Дунё" АА мухбири.

Унда Ўзбекистонда темирйўл локомотив ва вагонларини таъмирлаш ҳамда улар учун эҳтиёт қисмларни ишлаб чиқариш соҳасида ҳамкорлик қилиш масалалари муҳокама қилинди.

Компаниянинг кўп йиллик тажрибаси ва илғор технологияларидан фойдаланган ҳолда мамлакатимизда ишдан чиққан локомотив ва вагонларни замонавий кўринишда таъмирлаш бўйича ўзбек томони билан ҳамкорлик қилиш компания раҳбариятида катта қизиқиш уйғотмоқда.

Малайзия вакили Ўзбекистоннинг тегишли корхоналарига, жумладан логистика марказлари ва темирйўл юк терминалларига локомотивларни узоқ муддатли лизинг асосида беришга тайёрлигини билдирди.

Учрашувда хориж томони билан мамлакатимизда темир йўллари соҳасида фаолият олиб бораётган ёш муҳандислар ва таҳсил олаётган битирувчи талабаларни "SMH Rail" компаниясида малака ошириш ва махсус тажриба алмашинувини йўлга қўйишга келишиб олинди.

"SMH Rail" компанияси 1999 йилда Малайзияда ташкил этилган. Компания фаолияти темир йўл локомотивларини ва вагонларини, уларга эҳтиёт қисмларни ишлаб чиқариш, техник хизмат кўрсатиш, ишдан чиққан локомотив ва вагонларни замонавий кўринишда таъмирлашга ихтисослашган. Компания ҳозир кунда 15 та мамлакатга локомотив ва вагонларни етказиб бермоқда. У Малайзиянинг Селангор штатида, шунингдек Танзанияда, Таиланд ва Ҳиндистондаги заводларга эгалик қилади.