Тошкент, Ўзбекистон (UzDaily.uz) — Ўзбекистон Савдо-саноат палатасининг маълумотига кўра, Made in Uzbekistan халқаро кўргазмаси 2025 йил 11–13 февраль кунлари Покистоннинг Лаҳор шаҳрида бўлиб ўтади.

Кўргазмада текстил саноати, электротехника, чарм-пойабзал ишлаб чиқариш, қишлоқ хўжалиги, қурилиш материаллари ва фармацевтика каби турли тармоқлардаги етакчи ўзбек ишлаб чиқарувчилари ўз маҳсулотларини намойиш этади.

2024 йил сентябрь ҳолатига кўра, Ўзбекистон ва Покистон ўртасидаги ўзаро савдо ҳажми 311 млн АҚШ долларини ташкил этган. Бундан 228 млн доллар ўзбек экспорти, 83 млн доллар эса Покистондан импорт қилинган маҳсулотларга тўғри келган.

Савдо-саноат палатаси таъкидлашича, Made in Uzbekistan кўргазмаси бизнес алоқаларни кенгайтириш, савдо-иқтисодий ҳамкорликни мустаҳкамлаш ва янги ҳамкорлар топиш учун муҳим майдончага айланади.