Тошкент, Ўзбекистон (UzDaily.uz) — Коррупцияга қарши курашиш агентлиги 6,8 млрд сўмлик давлат харидлари жараёнида қонунчилик бузилганини аниқлади.

Маълумотларга кўра, Uzbekistan Airports томонидан боди-камераларни етказиб бериш, ўрнатиш ва ишга тушириш хизматларини кўрсатиш учун ташкил этилган тендерда жиддий қонунбузилиш ҳолатлари қайд этилган.

«Текширув жараёнида танлов таклифлари тўлиқ ва холис баҳоланмагани, аффилланган шахслар иштирок этгани ва баҳолашда хатоларга йўл қўйилгани аниқланди», — дейилади агентлик хабарида.

Шу муносабат билан харид комиссиясининг ғолибни танлаш бўйича баённомалари бекор қилинди ва тўпланган материаллар ҳуқуқни муҳофаза қилиш органларига юборилди.

Uzbekistan Airports эса ўз навбатида харид қонунчилик ва давлат харидлари тартибларига қатъий риоя қилинган ҳолда ўтказилганини билдирди. «Тендернинг барча босқичлари — танлов ҳужжатларини эълон қилишдан тортиб, таклифларни баҳолашгача амалдаги қоидаларга тўлиқ мувофиқ бўлган. Харид пайтида иштирокчилар ўртасида ўзаро боғлиқлик ҳақида комиссияда маълумот йўқ эди», — дейилган компания изоҳида.

Компаниянинг қўшимча қилишича, шартнома якуний қиймати ҚҚС билан 4,3 млрд сўмни ташкил этган, 6,8 млрд сўм эса тўпланган тижорат таклифлари асосида ҳисобланган бошланғич нарх бўлган. Таклифлар расмий сайт орқали қабул қилинган.

Шунингдек, баҳолаш жараёнида иштирокчилар ўртасида тўғридан-тўғри аффилланганлик аниқланмаган, оммавий ахборот воситаларида тилга олинган учинчи компания эса умуман тендерда қатнашмагани, балки захира ғолиби билан бир хил рўйхатдан ўтиш манзилига эга бўлгани таъкидланди.

«Бир нечта компаниянинг бир манзилда рўйхатдан ўтгани қонун билан тақиқланмаган, шу сабаб комиссия ғолибни четлатиш учун асосга эга эмас эди. Компаниялар ўртасидаги боғлиқлик факти фақат натижалар тасдиқланганидан кейин аниқланди», — дея қайд этилди изоҳда.

Коррупцияга қарши курашиш агентлиги тақдимномаси ва Uzbekistan Airports қарори асосида харид натижалари ҳақиқий эмас деб топилди ва тендер бекор қилинди.