Тошкент, Ўзбекистон (UzDaily.uz) — 2025 йил 20 май куни Корея Халқаро Ҳамкорлик Агентлиги (KOICA) ҳамда Жаҳон иқтисодиёти ва дипломатия университети (ЖИДУ) ўртасида “Ўзбекистондаги Жаҳон Иқтисодиёти ва Дипломатия Университетида Онлайн Таълим Тизимини Ривожлантириш ва Кибер Университет Ташкил Этиш Учун Муҳит Яратиш Лойиҳаси” бўйича Муҳокамалар баённомаси имзоланди.

Имзолаш маросимида Ўзбекистон Республикаси Олий Мажлиси Сенатининг биринчи ўринбосари ва ЖИДУ ректори Содиқ Сафоев, ўқув ишлари бўйича биринчи проректор Акрам Умаров, рақамли трансформация бўйича проректор Музаффар Жалолов ҳамда Корея делегацияси раҳбари KOICA вице-президенти жаноб Хонг Сок Хва, KOICA Ўзбекистондаги офиси директори жаноб Шин Мёнг Соп ва бошқа юқори мартабали расмийлар иштирок этди.

Янги лойиҳа Ўзбекистонда олий таълим соҳасининг рақамли инфратузилмасини мустаҳкамлашга қаратилган бўлиб, ЖИДУда тўлиқ электрон таълим тизимини яратишни назарда тутади. Умумий қиймати 6,9 миллион АҚШ долларини ташкил этувчи лойиҳа доирасида Электрон-таълим бўйича бош режани ишлаб чиқиш, академик ва операцион меъёрий ҳужжатларни шакллантириш, учта йўналиш бўйича таълим контентини яратиш, профессор-ўқитувчиларни тайёрлаш, IТ-платформаларни ишлаб чиқиш, зарур техник жиҳозлар билан таъминлаш ва рақамли таълим инфратузилмасини янгилаш кўзда тутилган.

Ўзбекистоннинг етакчи олий ўқув юртларидан бири сифатида ЖИДУ мазкур ташаббус орқали нафақат мамлакат, балки минтақа миқёсида рақамли таълим соҳасида илғор модель сифатида шаклланиши кутилмоқда. Лойиҳа Кореянинг Марказий Осиё учун мўлжалланган “К-Ипак йўли” ташаббуси доирасида ақлли таълим ва барқарор тараққиётни илгари суришга қаратилган кенг қамровли стратегиясининг бир қисмидир.

Мазкур янги ҳамкорлик лойиҳаси Корея ва Ўзбекистон ўртасидаги узоқ йиллик ишончли алоқаларни мустаҳкамлаб, икки томоннинг замонавий, очиқ ва сифатли таълим тизимини яратишга бўлган қатъий интилишини яна бир бор тасдиқлайди.