Тошкент, Ўзбекистон (UzDaily.uz) — 2025 йил 21 май куни Корея Халқаро Ҳамкорлик Агентлиги (KOICA) ва Ўзбекистон Республикаси Адлия вазирлиги “Ўзбекистонда интеллектуал мулк соҳасида давлат бошқаруви тизимини такомиллаштириш” номли янги лойиҳага доир Муҳокамалар баённомасини имзоладилар.

Имзолаш маросимида Ўзбекистон Республикаси Адлия вазири ўринбосари Икрамов Музраф, KOICA вице-президенти Ҳонг Сеок Ҳва, Интеллектуал мулк департаменти бошлиғи Бахрилло Хасанов, KOICAнинг Ўзбекистондаги офиси директори Шин Мёнг Соп ҳамда ҳар икки томоннинг бошқа юқори мартабали вакиллари иштирок этдилар. Ушбу янги ташаббус давлат бошқаруви соҳасида, хусусан рақамли воситаларни жорий этиш орқали давлат хизматларини модернизация қилиш борасида икки давлат ўртасидаги кучли ҳамкорликни акс эттиради.

Лойиҳа 2025–2029 йиллар давомида амалга оширилади ва унинг умумий қиймати 9,73 миллион АҚШ долларини ташкил этади. Лойиҳа доирасида интеллектуал мулк хизматларининг самарадорлиги, шаффофлиги ва очиқлигини ошириш мақсад қилинган. Хусусан, савдо белгиси ва патент аризаларини кўриб чиқишда сунъий интеллект технологияларига асосланган тизимларни жорий этиш, оммавий қидирув платформалари, статистик маълумотлар тизимларини ишлаб чиқиш режалаштирилган. Шунингдек, лойиҳа доирасида ташкилотларнинг салоҳиятини ошириш мақсадида ўқув семинарлари, АКТ ускуналари билан таъминлаш ва аҳолининг хабардорлигини оширишга қаратилган тадбирлар ўтказилади. Ушбу лойиҳа KOICA томонидан молиялаштирилади ва Кореяда интеллектуал мулк ҳуқуқлари соҳасида бой тажрибага эга бўлган Корея Патент Маълумотлари Институти (KIPI) томонидан техник жиҳатдан қўллаб-қувватланади.

Мазкур ҳамкорлик KOICAнинг Ўзбекистонда ҳуқуқий ислоҳотлар ва самарали бошқарув соҳасидаги кенгроқ мажбуриятларини давом эттиради ҳамда фуқароларга йўналтирилган, инновацияларга асосланган интеллектуал мулк тизимини шакллантириш бўйича мамлакатнинг саъй-ҳаракатларига муносиб ҳисса қўшади.