Тошкент, Ўзбекистон (UzDaily.uz) — Европа Иттифоқининг Олий вакили ва вице-президенти Кайа Калласнинг Марказий Осиёга ташрифи кейинга қолдирилди. Бу ҳақда ЕИнинг Ўзбекистондаги делегацияси хабар берди.

Дипломатик миссия маълумотига кўра, ташриф Каллас хонимнинг касалланиши сабабли энг яқин муддатга кўчирилган.

Шу билан бирга, Европа Иттифоқининг Марказий Осиё бўйича янги махсус вакили Эдуардс Стипрайс бугун Ашхободда юқори даражадаги музокаралар ўтказмоқда.

4 март куни Ашхободда Европа Иттифоқи ва Марказий Осиё давлатларининг 20-вазирлик учрашуви бўлиб ўтади. Кун тартибидаги асосий масала — ЕИ–МО саммитига тайёргарлик, шунингдек, Ўзбекистон, Тожикистон ва Туркманистон билан Кенгайтирилган шериклик ва ҳамкорлик тўғрисидаги битим (КШҲБ) имзоланиши режалаштирилган. Қозоғистон ва Қирғизистон ушбу ҳужжатни илгари имзолаган.