Тошкент, Ўзбекистон (UzDaily.uz) — Жорий йилнинг 19 февраль куни Иқтисодиёт ва молия вазирлигида “John Deere” компанияси вакиллари билан учрашув бўлиб ўтди. Учрашув давомида қишлоқ хўжалиги соҳасини ривожлантириш, фермер ва кластер хўжаликларини замонавий технологиялар билан таъминлаш ҳамда молиявий қўллаб-қувватлаш механизмларини такомиллаштириш масалалари муҳокама қилинди.

John Deere – дунёдаги етакчи қишлоқ хўжалиги, қурилиш ва ўрмон хўжалиги техникаси ишлаб чиқарувчиларидан бири бўлиб, 1837 йилда АҚШда ташкил этилган. Компания замонавий технологиялар ва инновациялар асосида ишлаб чиқарилган тракторлар, комбайнлар, пахта териш машиналари ва бошқа қишлоқ хўжалиги техникаларини таклиф этади. Шунингдек, John Deere Финансиалс орқали қишлоқ хўжалиги субъектлари учун молиявий ечимлар, жумладан, кредит ва лизинг хизматларини ҳам тақдим этади. Бугунги кунда компания глобал бозорга сифатли ва самарадор техникаларни етказиб берувчи ишончли ҳамкор сифатида тан олинган.

Учрашувда “John Deere” компаниясидан МДҲ мамлакатлари бўйича вице-президент Питер Заксе, глобал савдо молиялаштириш бўйича директор Тимо Захариас ҳамда Ўзбекистон бўйича директор Константин Кутелас иштирок этди. Шунингдек, “UHM Landtech” МЧЖ бош директори Бахтиёр Сабуров, Европа ва Америка мамлакатлари билан ҳамкорлик департаменти инвестиция менежери Ибрат Абдумаликов ҳамда Иқтисодиёт ва молия вазирлиги қишлоқ хўжалигидаги ислоҳотларни молиявий қўллаб-қувватлаш департаменти директори Алишер Захидов қатнашди.

Учрашувда:

• Қишлоқ хўжалиги субъектлари учун молиявий имкониятларни кенгайтириш – имтиёзли кредит линиялари билан боғлиқ масалалар муҳокама қилинди;

• Божхона имтиёзлари ва субсидия механизмларини такомиллаштириш – “John Deere” техникаларига божхона имтиёзлари ва субсидиялар қўллаш имкониятлари кўриб чиқилди.

Музокаралар давомида томонлар қишлоқ хўжалигида инновацион технологияларни кенг жорий этиш, фермер хўжаликларини молиявий қўллаб-қувватлаш механизмларини такомиллаштириш ва соҳага хорижий инвестицияларни жалб қилиш бўйича ҳамкорликни ривожлантиришга келишиб олдилар.