Тошкент, Ўзбекистон (UzDaily.uz) — Ўзбекистоннинг Жаҳон савдо ташкилотига (ЖСТ) аъзо бўлиш бўйича Ишчи гуруҳнинг ўнинчи йиғилиши 2025 йил 13 июнь куни Женевада бўлиб ўтади. Бу ҳақда Ўзбекистон Президентининг ЖСТ масалалари бўйича махсус вакили Азизбек Урунов ўзининг LinkedIn саҳифасида маълум қилди.

Урунов таъкидлашича, бўлажак йиғилишда асосий эътибор икки томонлама музокараларни ўтказиш, Ишчи гуруҳ Ҳисоботи лойиҳасига киритилган мажбуриятлар лойиҳаларини муҳокама қилиш, шунингдек, қишлоқ хўжалиги масалалари бўйича расмий бўлмаган учрашувни ташкил этишга қаратилади. Бу ташаббус Ўзбекистоннинг ташкилотга тўлиқ аъзо бўлиши жараёнини жадаллаштиришга қаратилган.

Янги савдо сиёсатлари доирасида Президент Шавкат Мирзиёев раҳбарлигида мамлакатда амалга оширилаётган кенг қамровли бозор ислоҳотлари ҳам йиғилишнинг алоҳида мавзуси бўлади. Бу ислоҳотлар иқтисодиётни янада эркинлаштириш, бозор очиқлиги ва рақобатбардошлигини оширишни кўзда тутади.

«Имкониятдан фойдаланиб, Ўзбекистоннинг ЖСТга қўшилиш жараёнини доимий қўллаб-қувватлаётган ташкилот аъзоларига самимий миннатдорлигимизни изҳор этамиз», — дея таъкидлади Урунов.

Маълумот учун, ҳозирга қадар Ўзбекистон 33 та давлат билан икки томонлама музокаралар ўтказган ва шулардан 24 та давлат билан бозорга кириш масалалари бўйича келишувларга эришилган.