Тошкент, Ўзбекистон (UzDaily.uz) — 9 май куни олиб борилаётган авариявий-тиклаш ишлари доирасида, кеча Жанубий Фарғона каналида юз берган техноген вазият – канал қирғоғининг емирилиши туфайли содир бўлган сув тошқини оқибатлари бартараф этилди, сув оқими тўхтатилиб, каналнинг емирилган қирғоқлари мустаҳкамланди.

Кеча ташкил этилган туну-кун режимидаги авариявий-тиклаш ишлари доирасида, 230 дан ортиқ ишчи кучи, 40 га яқин техника жалб қилиниб, 2000 м3 дан ортиқ тупроқ ва тош ишлари, 300 м3 дан ортиқ бетон-арматура ишлари бажарилди.

Айтиш лозимки, сафарбар қилинган кучлар, амалга оширилган тезкор чора-тадбирлар натижасида қисқа соатлар ичида сув тошқини бартараф қилинди, канал қирғоқлари мустаҳкамланиб, тўлиқ тикланди.

Амалга оширилган бетон ишлари канал қирғоқлари мустаҳкамлигини тўлиқ таъминлагандан сўнг, каналдаги сув оқими 11 май куни тикланади ҳамда одатдаги режимда ишлашни давом эттиради.

Булоқбоши тумани «Сарвонтепа» маҳалласини аввалгидан ҳам обод қилиш, маҳалла ҳудуди йўлларини асфальтлаш, аҳоли уй-жойларини таъмирлаш ишлари ташкил этилмоқда.