Тошкент, Ўзбекистон (UzDaily.uz) — Жорий йил 10-12 февраль кунлари Ўзбекистон Республикаси Ташқи ишлар вазири Б.Саидов бошчилигидаги Ўзбекистон делегацияси расмий ташриф билан Индонезия Республикасининг Жакарта шаҳрига бўлиб турибди.

Ташриф доирасида 11 февраль куни икки давлат ишбилармон доира вакиллари иштирокида Ўзбекистон-Индонезия бизнес форуми ҳамда B2B форматидаги икки томонлама учрашувлар ташкил этилди.

Унда икки мамлакатнинг тегишли вазирлик ва идоралари, саноат бирлашмалари, тижорат банклари ҳамда қишлоқ хўжалиги, электротехника, тўқимачилик ҳамда чарм саноати йўналишларида фаолият юритувчи 100 дан ортиқ йирик компаниялар вакиллари қатнашди.

Тадбирда Ўзбекистон Савдо-саноат палатаси раиси Даврон Вахабов ҳам ўз нутқи билан иштирок этди.

Форум доирасида икки томонлама савдо-иқтисодий ва сармоявий ҳамкорликнинг долзарб масалалари, саноат кооперациясини ривожлантириш чоралари муҳокама қилинди.

Шунингдек, мамлакатимизда амалга оширилаётган ислоҳотлар, тадбиркорлик фаолияти учун яратилган қулай шароитлар, Ўзбекистоннинг туризм ва саноат салоҳияти ҳақида атрофлича маълумотлар берилди.

2024 йил ҳолатига кўра, Ўзбекистон ва Индонезия ўртасидаги ташқи савдо айланмаси ҳажми 79,3 млн долларни ташкил этади. Индонезияга амалга оширилган экспорт — 10,8 млн доллар, импорт эса 68,5 млн доллардан иборат.

Тадбир якунлари бўйича, икки давлат ишбилармон доира вакиллари ўртасида икки томонлама ҳамкорликни ривожлантиришга қаратилган бир қатор келишувларга эришилди.

Хусусан, Ўзбекистон Савдо-саноат палатаси ва Индонезия Савдо-саноат палатаси ўртасида ўзаро англашув меморандуми имзоланди.