Жаҳон чемпионатларида юқори натижаларга эришган спортчиларга BYD автомобили ва пул мукофотлари топширилди

Тошкент, Ўзбекистон (UzDaily.uz) — Бокс, оғир атлетика, байдарка ва каноэда эшкак эшиш бўйича жаҳон чемпионатларида юқори натижалар қайд этган спортчи ва уларнинг мураббийларига президент совғаси топширилди.

Мусобақаларда олтин медаль олганларга 15 000 доллар, кумуш олганларга 7500 доллар, бронза олганларга 3750 доллар ҳамда уларнинг мураббийларига эса маблағнинг тенг ярми ҳисобида бир марталик пул мукофоти берилди.

Шунингдек, олтин медаль совриндорларига BYD Song Plus Champion, кумуш ва бронза эгаларига эса BYD Chazor автомобиллари калитлари тақдим этилди.

Маълумот учун, Руслан Нурудинов Баҳрайнда бўлиб ўтган оғир атлетика бўйича жаҳон чемпионатида ўзи ўрнатган жаҳон рекордини янгилаб, уч карра жаҳон чемпиони бўлганди.

Миланда ўтган байдарка ва каноэда эшкак эшиш бўйича Жаҳон чемпионатида эса Артур Гулиев олтин медални қўлга киритганди.

Ўзбекистон терма жамоаси Англиянинг Ливерпул шаҳрида ўтказилган бокс бўйича Жаҳон чемпионатини 11 та — 6 та олтин, 2 та кумуш ва 3 та бронза медаль билан якунлаган.