Тошкент, Ўзбекистон (UzDaily.uz) — Жорий йилнинг 26 август куни Жаҳон банки делегацияси вакиллари ҳамда Ўзбекистон Республикаси Иқтисодиёт ва молия вазирининг биринчи ўринбосари Илҳом Норқулов ўртасида учрашув бўлиб ўтди.

Учрашувда Халқаро молия корпорациясининг Ўзбекистондаги ваколатхонаси раҳбари Нил Маккейн, Жаҳон банкининг етакчи иқтисодчиси Мартин Мелекки, Жаҳон банкининг молиявий сектор бўйича етакчи мутахассислари Ерали Бексултан ва Валерия Гоффе ҳамда Иқтисодиёт ва молия вазирлиги департаменти директори Тимур Хусанов, “Тадбиркорликни ривожлантириш компанияси” АЖ директори Аббосхон Махаматов ва бошқа масъул вакиллар иштирок этди.

Мулоқот давомида томонлар мамлакатимизда кичик ва ўрта тадбиркорликни ривожлантиришда ҳамкорликни кенгайтириш, ушбу йўналишда қўшма ташаббус ва лойиҳаларни амалга ошириш масалалари юзасидан муҳокамалар олиб борди.

Хусусан, муҳокамалар давомида томонлар қуйидаги масалаларга алоҳида тўхталиб ўтди.

кичик ва ўрта бизнес субъектларини қўллаб-қувватлаш, уларнинг молиявий ресурсларга кенгроқ киришини таъминлаш ҳамда молиявий инклюзивликни ривожлантириш;

FINGROW (Financial Inclusion for Growth, Returns, and Opportunities for Work) дастурий ёндашуви доирасида янги лойиҳаларни ишлаб чиқиш ва амалга ошириш;

кичик ва ўрта бизнесни ривожлантириш орқали сифатли ва расмий бандликни кенгайтириш, тадбиркорлик субъектларининг имкониятларини ошириш.

Музокаралар якунида томонлар ўзаро ҳамкорлик алоқаларини ривожлантириш ҳамда юқоридаги йўналишлар юзасидан фикр алмашинуви жараёнларини кенгайтиришга келишиб олди.