Тошкент, Ўзбекистон (UzDaily.uz) — Июнь ойида IT Park таркибига экспортга ихтисослашган яна 58 та янги технологик компания қўшилди. Бу ҳақда технопарк матбуот хизмати хабар берди.

Улардан ярми — 29 та компания — хорижий сармоя иштирокида ташкил этилган бўлиб, уларнинг таъсисчилари Венгрия, Португалия, Румыния, БАА, Туркия, Индонезия, Япония ва бошқа мамлакатлардан.

Июнь ойи якунига келиб, IT Park’даги экспортга йўналтирилган резидентлар сони 750 тага етди, шулардан 228 таси Тошкентдан ташқари ҳудудларда фаолият юритмоқда. Ушбу компаниялардан 776 таси хорижий фирмалар бўлиб, шуларнинг 206 таси вилоятларда жойлашган.

Технопарк дирекцияси қатор резидентларнинг юқори экспорт салоҳиятига эга эканини таъкидлади. Хусусан:

Mont Tech Systems (БАА сармояси) Тожикистон мижозлари учун SaaS хизматлари ва IT-консалтинг орқали 8,5 миллион долларлик экспортни амалга оширишни режалаштирмоқда.

Ruby Talent Solutions (Португалия ва Венгрия сармояси) АҚШ бозори учун масофавий жамоаларни танлаш ва бошқариш бўйича аутсорсинг хизматлари кўрсатади, 1 йилда 3 миллион доллардан ортиқ экспорт кутилмоқда.

Accesa (Румыния компаниясининг «дочка»си) дастурий таъминот яратиш, IT-консалтинг ва дизайн хизматларини Румыния ва Германия мижозларига тақдим этади. Бир йилда 2,2 миллион долларлик экспорт ва 40 тагача иш ўрни яратиш режалаштирилган.

Guaraqe (Бразилия) АҚШ бозори учун дастурий таъминот ишлаб чиқиш ва техник хизмат кўрсатиш орқали 1,5 миллион долларлик экспортга эришишни мақсад қилган.

2025 йилнинг дастлабки беш ойида IT Park’да 636 та янги компания рўйхатдан ўтган бўлиб, 284 таси экспортга йўналтирилган. Улардан 164 таси хорижий таъсисчилар иштирокида ташкил этилган.