Тошкент, Ўзбекистон (UzDaily.uz) — Истанбул шаҳрида (Туркия) халқаро қидирувда бўлган Ўзбекистон фуқароси қўлга олинди. Бу ҳақда Ўзбекистон Республикаси Ички ишлар вазирлиги матбуот хизмати хабар бермоқда.

Вазирлик маълумотларига кўра, 29 ёшли Д.Е. Тошкент шаҳар Ички ишлар бош бошқармаси томонидан Ўзбекистон Республикаси Жиноят кодексининг 168-моддаси 3-қисми (жуда катта миқдорда фирибгарлик содир этиш) бўйича гумон қилинган ҳолда қидирувга берилган эди.

У Туркия ҳудудида қўлга олинган ва шундан сўнг Ватанга депортация қилинган. Айни пайтда у тергов ҳаракатларини амалга ошириш учун Ўзбекистон ҳуқуқни муҳофаза қилувчи органларига топширилган.

Ички ишлар вазирлиги, ушбу шахснинг ғайриқонуний ҳаракатларидан жабр кўрган барча фуқароларни ички ишлар органларига мурожаат қилиб, ариза бериш ва кўрсатма беришга чақирмоқда.