Тошкент, Ўзбекистон (UzDaily.uz) — Жорий йилнинг 10 февраль куни Ўзбекистон Республикаси Инвестициялар, саноат ва савдо вазири Лазиз Кудратов ва Қозоғистон Республикасининг Ўзбекистон Республикасидаги Фавқулодда ва Мухтор Элчиси Бейбут Атамқулов, ташқи ишлар вазири ўринбосари Алибек Куантйров ҳамда савдо ва интеграция вазири ўринбосари Кайрат Торебаев ўртасида учрашув бўлиб ўтди.

Суҳбат чоғида мамлакатлар ўртасидаги иқтисодий алоқаларни мустаҳкамлаш, товар айирбошлаш ҳажмини кўпайтириш ва саноат кооперациясини ривожлантиришга қаратилган икки томонлама ҳамкорликнинг асосий масалалари муҳокама қилинди.

Томонлар конструктив фикр алмашиб, яқин истиқболдаги аниқ вазифаларни белгилаб олди. Хусусан, ўзаро савдода чекловларни бекор қилиш, қишлоқ хўжалиги маҳсулотларини етказиб бериш учун квоталар ажратиш, товарларнинг келиб чиқишини сертификатлашнинг электрон тизимларидан фойдаланиш, назорат-ўтказиш пунктларини модернизация қилиш борасида келишиб олинди.

“Марказий Осиё” саноат кооперацияси халқаро маркази” фаолиятини янада ривожлантириш имкониятлари ва товар айирбошлаш ҳажмини 10 миллиард долларга етказиш дастурини мувофиқлаштириш жараёни алоҳида кўриб чиқилди.

Учрашув якунлари бўйича томонлар муҳокама қилинган масалаларни қисқа муддатларда амалиётга татбиқ этиш тайёрлигини билдирдилар ҳамда аниқ муддатлар ва масъул шахсларни белгилаб олдилар.