Тошкент, Ўзбекистон (UzDaily.uz) — Ханжоуда ИССВ делегацияси билан Alibaba Group вакиллари ўртасида музокаралар бўлиб ўтди. Томонлар 100 та ўзбек компанияси учун Alibaba Export Accelerator – Узбекистан дастурини ишга тушириш, шунингдек, маҳсулотларни Aliexpress, Tmall ва Taobao маркетинг платформалари орқали бевосита сотишни йўлга қўйишга келишиб олдилар.

Бундан ташқари, JD.com билан “Made in Uzbekistan” онлайн павильонини яратиш ва маҳсулотларни Хитойдаги логистика хаблар орқали B2B2C форматида етказиб бериш бўйича келишувга эришилди.

Ташриф доирасида делегация ШҲТ электрон савдо бўйича ишчи гуруҳининг 8-йиғилишида иштирок этди. Ўзбекистон томони рақамли трансформацияни чуқурлаштириш, электрон майдончалар орқали экспорт салоҳиятини ошириш, минтақавий ҳамкорлик асосида инклюзив ўсишни ривожлантириш ва бошқа ташаббусларни илгари сурди. Таклифлар ШҲТга аъзо давлатлар томонидан қўллаб-қувватланди.