Тошкент, Ўзбекистон (UzDaily.uz) — Жорий йилнинг 26-27 февраль кунлари Ўзбекистон инвестициялар, саноат ва савдо вазири ўринбосари Шоҳрух Гуламов бошчилигидаги делегация БААда бўлиб, Абу-Даби шаҳрида Араб давлатлари лигаси кўмагида ўтказилган Араб давлатлари, Марказий Осиё давлатлари ва Озарбайжон бизнес-форумида ҳамда Инвестопиа халқаро форумида иштирок этди.

Тадбирларда Форс кўрфази араб давлатлари ҳамкорлик кенгаши (GCC), Марказий Осиё ва Озарбайжоннинг инвестиция ва савдо вазирлари иштирок этди.

Асосий мавзулар қаторида агросаноат соҳасида кооперацияни ривожлантириш, ҳалол маҳсулотлар ишлаб чиқариш, яшил иқтисодиёт, нефть-газ саноати, инфратузилмани ривожлантириш, сунъий идроқни жорий этиш каби масалалар муҳокама қилинди.

Форумда сўзга чиққан Шохрух Гуламов GCC давлатлари, Марказий Осиё ва Озарбайжоннинг ўзаро ҳамкорлигини мустаҳкамлаш, янги имкониятларни ўрганиш ва барқарор ривожланишни таъминлаш платформаси ҳисобланган ушбу тадбирнинг аҳамиятини алоҳида таъкидлади.

Форум иштирокчилари Ўзбекистонда инвестиция ва ишбилармонлик муҳитини яхшилаш борасида амалга оширилаётган ислоҳотларнинг натижалари билан таништирилди. Хусусан, мамлатимизда охирги йилларда иқтисодиётнинг очиқлиги таъминлангани, тўсиқлар бартараф этилгани, солиқ ва йиғимлар камайтирилгани, инвесторларнинг ҳуқуқ ва манфаатларини ҳимоя қилиш қонун билан мустаҳкамлангани, хусусийлаштириш дастури амалга оширилаётгани, инфратузилмаси ривожланган ЭИЗлар ташкил этилаётгани қайд этилди.

Натижада мамлакат иқтисодиёти қарийб икки баравар ошди, ўтган йилда ўсиш суръатлари 6 фоиздан кўпайди. Марказий Осиё давлатлари билан товар айирбошлаш ҳажми 7 миллиард долларга, GCC мамлакатлари билан эса 1 миллиард долларга етди. Ўзбекистоннинг Форс кўрфази ва Марказий Осиё мамлакатлари билан инвестиция портфелининг умумий қиймати 70 миллиард долларни ташкил этади.

Минтақа давлатлари билан ҳамкорликни янада чуқурлаштиришга тайёрлик билдирилди. Шу ўринда, қишлоқ хўжалиги, тўқимачилик, тоғ-кон саноати, энергетика, соғлиқни сақлаш ва туризм каби соҳалардаги ҳамкорликнинг улкан имкониятлари алоҳида таъкидланди.

Ўз сўзининг якунида Шохрух Гуламов тадбир қатнашчиларини шу йилнинг май ойида Самарқанд шаҳрида бўлиб ўтадиган Марказий Осиё ва GCC давлатларининг иккинчи йиғилишида иштирок этишга таклиф этди.

Ташриф доирасида Бирлашган Араб Амирликларининг йирик компаниялари раҳбарлари билан учрашувлар ўтказилди. Музокараларда амалга оширилаётган лойиҳаларни жадаллаштириш бўйича қўшма чора-тадбирлар ишлаб чиқилди ҳамда ҳамкорлик кўламини кенгайтириш ва самарадорлигини оширишнинг янги йўналишлари белгиланди.