ИССВ AIIB билан хусусий секторни молиялаштиришни кенгайтириш ва яшил энергияни муҳокама қилди

Тошкент, Ўзбекистон (UzDaily.uz) — 10 февраль куни Ўзбекистон Республикаси Инвестициялар, саноат ва савдо вазири Лазиз Кудратов Осиё инфратузилмавий инвестициялар банки (AIIB) Президенти Зоу Жиайи билан илк расмий учрашувни ўтказди.

Вазир Банк Президентини лавозимга тайинлангани билан табриклаб, Марказий Осиёга амалга оширилган илк ташриф рамзий аҳамиятга эга эканини таъкидлади.

Қайд этилишича, Ўзбекистон минтақада AIIBнинг энг йирик ҳамкори бўлиб қолмоқда - Банкнинг Марказий Осиёдаги операцияларининг 51 фоизи мамлакатимиз ҳиссасига тўғри келади. Глобал миқёсда эса республика операциялар ҳажми бўйича 6-ўринни эгаллайди.

Қўшма лойиҳалар портфели 7 миллиард АҚШ долларидан ошди. 2024 йилда Самарқанд шаҳрида AIIB Бошқарувчилар кенгашининг 6 йиллик йиғилиши бўлиб ўтди.

Томонлар 2030 йилгача бўлган ҳамкорликнинг устувор йўналишларини муҳокама қилдилар. Жумладан, хусусий сектор учун суверен бўлмаган молиялаштиришни кенгайтириш, ДХШ лойиҳаларини қўллаб-қувватлаш, «яшил» энергетикани ривожлантириш ҳамда “Қашшоқликдан фаровонлик сари” дастурини амалга ошириш масалалари кўриб чиқилди.

Учрашув якунида вазир AIIB Президентини 2026 йил 16–19 июнь кунлари бўлиб ўтадиган Тошкент халқаро инвестиция форумида иштирок этишга таклиф қилди.