Исроил ва АҚШ Эронга зарбалар бериб, Яқин Шарқдаги вазиятни кескинлаштирди

Тошкент, Ўзбекистон (UzDaily.uz) — Исроил ва АҚШ Эрондаги ҳарбий объектларга зарбалар берди, бу эса Яқин Шарқда кескин таранглик кучайишига ва томонлар ўртасида ўзаро зарбалар алмашинувига олиб келди.

Исроил Мудофаа кучлари матбуот хизмати маълум қилишича, шанба куни Исроил АҚШ Қуролли кучлари билан биргаликда Эронга қарши кенг кўламли операцияни бошлаган.

Исроил томонининг таъкидлашича, зарбалар «кенг қамровли, мувофиқлаштирилган ва қўшма операция» доирасида ўнлаб ҳарбий нишонларга берилган бўлиб, улар Исроил Давлатининг хавфсизлигига таҳдидларни бартараф этишга қаратилган.

Теҳронда бу ҳаракатлар тажовуз сифатида баҳоланди. Эрон Ташқи ишлар вазирлиги расман АҚШ ва Исроилни халқаро ҳуқуқни бузганликда айблаб, зарбалар Теҳрон ва Вашингтон ўртасида дипломатик жараён давом этаётган бир пайтда мамлакатнинг фуқаролик ва ҳарбий инфратузилмасига берилганини маълум қилди.

Баёнотда АҚШ ва Исроилнинг ҳаракатлари Эроннинг суверенитети ва ҳудудий яхлитлигига тажовуз қилаётгани таъкидланган.

Эрон Қуролли кучларининг бир қисми ҳисобланган Ислом инқилоби қўриқчилари корпуси жавоб ҳаракатлари бошланганини тасдиқлади.

ИИҚК хабарида Исроил томонга, Ислом Республикасига қарши амалга оширилган тажовузга жавоб тариқасида, ракетали зарбаларнинг биринчи тўлқини ва учувчисиз учиш аппаратлари учирилгани айтилган.

Эрон давлат оммавий ахборот воситалари ҳам Теҳрон Қатар, Қувайт, Бирлашган Араб Амирликлари ва Баҳрайнда жойлашган тўртта АҚШ ҳарбий базасига зарбалар берганини хабар қилди. Шунингдек, Иорданиядаги Америка базалари ҳам нишонга олингани айтилмоқда.

АҚШ президенти Дональд Трамп ҳам кескин баёнот билан чиқди.

У видео мурожаатида Қўшма Штатлар Эроннинг ракета саноатини, ҳарбий-денгиз кучларини йўқ қилиш ва Теҳронга содиқ гуруҳлар томонидан минтақани янада беқарорлаштиришга йўл қўймаслик ниятида эканини билдирди.

Трампнинг сўзларига кўра, Вашингтон минтақадаги қуролли тузилмалар Яқин Шарқ хавфсизлигига ва Америка кучларига таҳдид сола олмайдиган тарзда ҳаракат қилади.

Исроил, АҚШ ва Эрон ўртасидаги зарбалар алмашинуви можаронинг янада кескинлашиш хавфини кескин оширди, унинг оқибатлари эса минтақа доирасидан анча ташқарига чиқиши мумкин.