Тошкент, Ўзбекистон (UzDaily.uz) — 24 июнь куни Исроил Бош вазири Биньямин Нетаньяхунинг девони АҚШ Президенти Дональд Трамп томонидан таклиф этилган Эрон билан ўт очишни тўхтатиш режасига Исроилнинг расман рози эканини тасдиқлади. Бу ҳақда Reuters агентлиги хабар берди.

Бундан аввал Дональд Трамп Truth Social ижтимоий тармоғида Исроил ва Эрон «тўлиқ ва умумий» сулҳ тўғрисида келишувга эришганини маълум қилган эди. Унинг сўзларига кўра, ушбу келишув ҳар икки томоннинг амалдаги операциялари якунланганидан тахминан олти соат ўтгач кучга киради. Сулҳ босқичма-босқич амалга жорий этилади: аввал уни Эрон бажара бошлайди, 12 соатдан сўнг эса Исроил қўшилади, ва 24 соат ўтгач, 12 кунлик можаро расман тугатилгани эълон қилинади.

Трамп, шунингдек, ҳар икки давлатга вазиятни кескинлаштирмаслик, сабр-тоқат, жасорат ва ақл-заковат намоён этгани учун миннатдорлик билдирди. Aйнан шу фазилатлар минтақани узоқ ва вайронкор урушдан сақлаб қолишга ёрдам берганини таъкидлади.

Кейинроқ Трамп сулҳ режими амалга кирганини тасдиқлади ва томонларни унга қатъий риоя қилишга чақирди.